花拉科茜 (Farrah Fawcett) 仙遊, 明珠台罕有念舊重播《神探俏嬌娃》(Charlie's Angels), 當然不是七十年代由譚炳文配查理的版本, 但正如我對「視癡」網友所言, 電視台的舉動實在彌足珍貴, 該可能是電視台資深高層拍板的. (從前畢蘭加士打去世, 明珠台也立即播出影帝作《靈與慾》(Elmer Gantry)懷緬, 可見電視台確是有高人埋伏的)
咁大個女, 其實都無正式睇過《神探俏嬌娃》. 先看的是俏嬌娃前夫─《無敵金剛》 (The Six Million Dollar Man) 的紅顏知己《無敵女金剛》(The Bionic Woman). 明珠台話播, 我梗係坐定定睇喇.
第一代神探俏嬌娃
第二代神探俏嬌娃
三位女主角中, 人嬌聲更嗲的花拉科茜, 其實並不是我杯茶. 我喜歡的是積琪蓮史密夫 (Jaclyn Smith) . 我估老豆也看過《神探俏嬌娃》 (以前老是建議我改名叫積琪蓮, 不知是因為積琪蓮史密夫, 還是積琪蓮甘迺迪的緣故) 她是三人之中完全沒有變樣的一位 (也是唯一一個留在劇組的女主角) , 就算老去也美得自然. 姬蒂積遜成個樣「梗哂」, 眼睛更有向上吊的趨勢. 後來加入的雪莉列特 (Cheryl Ladd) 較少人提及, 其實積琪蓮史密夫還對執二攤的她稱讚有加.
積琪蓮史密夫在《神探俏嬌娃續集》電影版曾化身女神, 客串一幕, 風采依然.
以現時的生活指數來說, 《神探俏嬌娃》拍於七十年代, 節奏是有點緩慢, 但劇情完全做到起承轉合, 加上一點懸疑 (還有後生Tommy Lee Jones客串演出) , 俏麗三嬌娃聰明機靈又夠醒, 遇到真正危險時又有查理出聲幫助, 娛樂性頗豐富啊!
姬蒂積遜, 花拉科茜, 積琪蓮史密夫在2004年艾美獎頒獎禮上聚首, 悼念《神探俏嬌娃》大旗手Aaron Spelling. 全場熱烈鼓掌. 三位俏嬌娃, 「誰人代替妳地位」!
伸延閱讀: Donald Kwan Leisure:俺僕誌記 歷代女探俏嬌娃
2 則留言:
積琪蓮史密夫又真係KEEP得唔錯...家陣明珠台肯播，查實有D位家陣睇覺得幾搞笑，但有得睇佢地三人演出，已經非常之難得。
睇番schedule, 明珠台只會播Pilot. 而尋晚Ugly Betty亦讓路俾Farrah Fawcett回顧節目. 算係難得了!
Farrah Fawcett原來唔只空有一副好樣. 其實佢可以有更好發展, 際遇上唔算差, 只係佢唔鍾意長時間拍攝, 所以作品只限於電視電影之類. "以牙還牙" (Extremities) 係佢力作 (The Burning Bed, Small Sacrifices都充滿爭議性), 唔知道香港劇壇有冇興趣搬上舞台?
發佈留言