我壯烈犧牲了《殭屍新戰士》(Vampire Warriors)

羅守耀一年鉅獻兩片, 質素如何, 人盡皆知. 近日盛傳裕泰興暫停拍片, 如無意外, 《殭屍新戰士》暫時是羅守耀最後一擊. 本來影友相約我齊齊去做「烈士」, 見識羅守耀的本事. 對方臨時轉移陣地, 自己唯有獨自上陣, 壯烈犧牲.

看畢《殭屍新戰士》, 我相信日理萬機的羅守耀, 大有可能在下班離開辦公室後, 才騰出空檔去拍電影: 求其搵油麻地果欄魚檔、大坑邨舊樓之類的場景當拍攝場地. 演員行行企企, 唸著一些羅生自以為好笑、但觀眾都無反應, 爛無可爛的gag. 影片拖左三分一, 都仲未講到故事中心. 羅守耀做生意或者唔差, 但編劇真係水皮. 如果有一個似樣o既編劇去救番個劇本都好d. 《殭屍新戰士》擺明想學《吸血新世紀》加《我和殭屍有個約會》, 成套戲拖泥帶水, 浪費演員又浪費劇本... 羅生拍到套戲好Q悶~

以為羅守耀搵錢小豪同元華會有睇頭, 但我好懷疑佢有冇睇《殭屍先生》系列. 錢小豪vs元華, 兩個識打之人, 梗係唔好浪費「武術指導」啦! 點知捉到鹿唔識脫角. 錢小豪戲份奇少. 其實佢地都唔算係主角 (元華由頭廢up到尾) , 羅生御用愛將Tomboy蔣璐霞才是正印. 蔣璐霞扮馬小玲負責打, 明明捉殭屍又要浪費體力打完一輪先出殺手鐧, 哂氣! 以打鬥場面黎講真係好公式化. 而想睇周秀娜露肉的朋友就肯定失望. 周小姐露少少, 負責文戲, 演技尚且生硬, 勝在Kawai Outlook搭救. 客串的張文慈反而表現不錯, 只是發揮地方不多.

如果羅守耀想藉著電影去振興市道或賺錢, 我勸他專心打理家族生意好了. 否則, 若然他想以「cult片王」Daniel S.Y.Law之名, 將來傳頌於外國影壇或影迷之間, 簡直是癡人說夢.

必睇硬膠場面:

1) 蔣璐霞扯外套條線幫自己縫傷口

2) 殭屍男女競猜阿婆死亡時間

3) 蔣璐霞去齋舖偷野食, 周秀娜咬蕃茄醬罐

4) 元華的清裝殭屍造型

5) 殭屍男女在尖沙咀碼頭 (實景是中環碼頭) 觀看狗男女車輪戰

6) 周秀娜攞住一隻白兔毛公仔吸血

7) 蔣璐霞變殭屍前臨別秋波, 在太陽底下耍拳

(可能會成為經典) 硬膠對白:

周秀娜: 呢隻係真蝦黎架?

蔣璐霞: 係用大豆, 麵粉, 麵筋做出黎o既.

周秀娜: 咁呢個呢?

蔣璐霞: 魚肉.

周秀娜: ... 條芹菜好真喎! 用咩野做架?

錢小豪: The night is still young! (時間還很早!)

元華: Hello! My breaskfast!

周秀娜: 我隻哥基呢? 我d哥基去哂邊? (周秀娜阿哥食左阿妹d食物)

元華: 你攪乜鬼呀? 有人唔做, 要做殭屍?

烈士證書

伸延閱讀: 《殭屍新戰士》：羅守耀「攞命」大爆發